Songen om Marie

Maries trøyst

Marie hadde vondt i hjarta. Det gjorde så vondt at ho ikkje visste kva ho skulle gjera, tårene spratt frå augo hennar, ho beit fast i det næraste ho kunne finna for å ikkje skrika, det var øyra til han ho elska.

I dag, 50 år seinare, fortel Marie denne historia på fjernsyn. Mannen hennar mangler øreflippar. Etter kvart gjorde det mindre vondt, seier ho.

Den dagen røynda skylde over Marie

Den dagen røynda skylde over Marie, var ho på butikken for å kjøpa:

1 l H-mjølk
2 l skumma mjølk
1 pakke Vestkystsalat
1 langebrød
1 glas sylteagurk
2 hekto kokt skinke
og ein liten torsk til middag

På heimvegen såg ho røynda koma mot seg som ei mannshøg, brun bylgje. Etter at bylgja hadde skylt over henne reiste ho seg opp, strauk håret bak øyro og heldt fram med å gå.

Då Marie hadde tømt hjarta sitt

Faen, sa Marie, er det gratis påfyll? Hæ, sa den vesle guten med det raude hjarta bak disken. Javel, sa Marie og kyste han. Og hjarta hennar vart fylt av ei skinande, blå einsemd.

Før Marie reiste

Før Marie reiste klypte ho ut hjarta sitt. Hjarta var nyføddrosa, det banna stygt og freista bita henne i fingrane.

Marie såg bort på mannen i senga, han sov. Ho smilte og sleppte hjarta på bringa hans, det åt seg inn.

Så lakka Marie neglene og gjekk, utan hjarta, utan truse.